Heim
Visjon
Administrasjon
Personale

Biblioteket
Boklister
Diverse informasjon
Mål- og tiltaksplan
Reglement
Skulerute

Storyline ved HVS
Utviklingsarbeid
Yrkesmessa

Kontakt HVS
Elevkvardagen
Kva skjer
Helsetenesta
Rådgjevar
Ut av klasserommet!
Skule + næringsliv
Faglege turar
Aktivitetsdagar
Studietilbod
Studietilbod ved HVS
(Revidert 2006)
Kunnskapsløftet 2006
Læreplanar (alle fag)





  Du er her: Faglege turar > 3IBD til Madrid


Frå forretningsturen gjennomført av IBD Consulting UB til Madrid juni 2007.

Tre spesielle skuledagar
Dato: 05.-07.06.07.
Foto: J.M.Helland

Tysdag 5. juni 2007
Klokka 08:45 møter 3IBD (International Business Developement) på 12 elevar og læraren deira opp ved Haram vidaregåande skule, klare for avreise til Spania og Madrid.


12 glade 3IBD-elevar før avreise.
Bak kamera står læraren deira, Jan Magne Helland.


Turen vidare til Vigra, Gardermoen og tilslutt Madrid, går som planlagt. På Gardermoen gjer vi våre siste førebuingar mens vi venter på neste flyavgang.
Skal ein på bedriftsbesøk i utlandet, må gåvene vere i orden, og vi legg siste hand på verket.

Då flyet letta frå Gardermoen er det roleg summing mellom passasjerane, men etter kvart som vi nærmar oss Madrid, aukar volumet av spansktalande som fyller rommet. Det går opp for oss at vi snart er i Spania.

Vi ventar på bagasjen, venter og venter. Rundt oss pressar utålmodige medpassasjerar på. Innimellom jaller eit varskurop, ein ivrig spanjol bryt seg fram og reddar kofferten sin før den følgjer bandet og går ut luka til 3. runde.

Gåveklargjering på Gardermoen
Bagasjen vår kjem heilt til slutt, ingenting manglar. Vi er dei siste som forlet ankomsthallen. Rushet er over, og vi kan roleg spasere ut i drosjene og ta motorvegen inn til Calle Atocha og Madrid.

Vi køyrer med opne vindauge. Ein varm god kveldsbris møter oss, og det kjennes godt å vere her. Hostell Castello er ok; - billig, reint og ligg sentralt til. Kristine og Frida fann hotellet då dei var her i februar.


Kveldskos og storbystemning


Endeleg - vi er i Madrid!
Vi tek turen til Plaza Major. Kveldsola varmar enno. Vi ser på livet, mens vi nyt Paella, kylling eller spagetti. Og ser fram til neste dag ...

For tidleg neste morgon skal vi til verdas nest største fiskemarknad MercaMadrid (berre Tokyo er større). Vi skal møte Jose Maria Barrio Burgos som har ansvar for stand/Puesto 106 "Pesacados Conchamar". Kontakten er formidla gjennom Sindre Longva (Brattvåg/Ålesund/Madrid). Utan denne kjennskapen hadde vi neppe kunna gjennomført turen.

Vi har fått økonomisk støtte gjennom Ungt Entreprenørskap i Møre og Romsdal og Eksportutvalget for fisk i Tromsø, i tillegg har overskotet frå ungdomsbedrifa IBD Consulting gått med.I kjøleskapet på hotellet ventar ”varene”. Vi har gjennomført oppdraget etter planen. Produkta har blitt frakta frå produsenten på Tustna v/Kristiansund til Madrid utan at kjølelina har blitt broten.

Den siste etappen verkar grei, men kva møter oss på MercaMadrid?
Vil vi finne fram, og kven er Jose Maria Barrio Burgos, vil han møte oss, og får vi levere varene?


Onsdag 6. juni 2007
Klokka er 06:15. Vi oppsøkjer resepsjonen og vekkjer ein søvnig resepsjonist. Han rister oppgitt på hovudet, ”- ... ingen drosje å få på denne tida av døgnet", seier han oppgitt. Og vi tok ikkje sjansen på å bestille dagen før. Lett for at nokon ville forsove seg og drosja måtte vente. Sunnmøringar har ikkje råd til slikt.

Ute er det klart og kaldt. Alle er lettkledde. Vi stiller i gamle klede og fottøy, ettersom vi har blitt varsla om at lukta vil sitte i. Det er likevel lett å få tak i drosje, og vi set kursen mot MercaMadrid, som er Spanias største marknad, der dei sel mange forskjellige varer. Det dekkjer eit område på storleik med Ålesund.

Drosjesjåførane snakkar ikkje engelsk, og det er ikkje gitt at dei veit kvar fiskemarknaden er, sjølv om den er ein av verdas største. Vår bil vil sleppe oss av ved porten, men vi nektar. Vi skal til fiskemarknaden. Han veit ikkje kvar fiskemarknaden er, men etter litt leiting er vi framme. Ingen av dei andre bilane har funne vegen. Dei har slept folk av på feil plass. Dei fleste ved porten. Etter ca. eit kvarter finn den andre gruppa og fram, og dei to andre gruppene er undervegs. Vi finn fram til stand 106, Jose Maria er ute i marknaden, men vil snart vere på plass.


På fiskemarknaden MercaMadrid

MercaMadrid
Etter 5 minutt kjem Jose Maria Barrio Burgos. Han tek svært vennleg imot oss. Han organiserer ein handel, mens vi ventar på å bli vist rundt på MercaMadrid. Ei streng vakt tek kontakt med oss, og ber oss forlate marknaden. Jose kjem hjelpande til og forklarer at vi er hans forretningskontaktar. Vi får vite at det er eigne guidar som tek folk med rundt på marknaden mot betaling, då dette blir sett på som ein stor attraksjon.

Mens vi ventar på at resten av gruppa vår skal finne fram, viser Jose oss rundt på marknaden. Han kjenner mange, og det er populært med alle jentene som er med. På fiskemarknaden er det nesten berre menn. Dei ulike salsområda har sine spesialitetar, både kjente og ukjente fiskeslag og skaldyr. Utvalet er enormt. Jose fortel at MarcaMadrid opnar klokka 0300 om natta, hallen er då fylt heilt opp, i nitida er så å seie alt borte. Resten av gjengen vår kjem, vi orienterer oss mot stand 106 og forretningssamtalane kan starte.

MercaMadrid


3IBD samla saman med Jose Maria (nr 4 frå venstre).

Jose Maria forklarer korleis marknaden fungerer.

Jose og Silje

Vi hang på på rundturen i det enorme lokalet.

MercaMadrid hadde mykje å by på!

Jose har spesialisert seg på kvitfisk, både fersk og salta. Han får overlevert prøveprodukta vi har med, vi vekslar kontaktinformasjonar, og han vil teste ut produkta og kome med tilbakemelding til produsent om dei kan vere aktuelle, og kva som må gjerast i forhold til innpakking, merking og eventuelt andre forhold.
Han har erfaring og fleire tankar om kva som skal til for at eit produkt skal lukkast på den spanske marknaden. Vi får vite at norsk kvitfisk går for å vere billig og bra nok, men at den beste kvaliteten kjem frå Færøyane, der fisken er større og kvitare, og difor kan seljast til ein høgre pris.Etter at forretningsoppdraget er gjennomført, blir vi beden på frukost i kantina til MercaMadrid, vi takkar ja til tilbodet. Jose spanderer Cola, kaffi, sprøsteikt blekksprutterningar, og potetsalat. - Dette er enkel, men kraftig kost, forklarer han, - Torghandlarane må ha kraftig kost for å fungere så tidleg på morgonen.


Oppdraget er fullført!

Drosjene venter på oss, og vi kan dra tilbake til hotellet. Jose har ordna med ein engelsktalande drosjesjåfør. Det manglar også ei drosje på tilbaketuren. Den er bestilt, men kjem aldri. Jose løyser saka, og tek med dei siste til privat omvisning i fiskebilen med levering av fisk til hotell og restaurantar i Madrid. Jose viser gladleg Madrid, og kva som er verdt å vite om denne byen.

Om ettermiddagen oppsøkjer vi supermarknader, og ser korleis fisken blir presentert for kunden. Butikkane har eigne avdelingar for fisk, og variasjon og omfang er enormt. Vi legg merke til at firma frå Færøyane og Island har eigne diskar med kvitefisk, medan det er vanskeleg å oppdage dei norske varene. Det kan verke som om varer frå Færøyane og Island har ei dominerande rolle i marknaden når det gjeld kvitfisk. Det er og ei stor promotering av laks frå eit spansk firma (Alcampo). Smaksprøver er det og å få. På spørsmål kvar laksen kjem frå, er svaret: ”Noruega”, sjølvsagt ”Noruega”. Norsk laks som er vidareforedla i Spania. Den smakte forresten svært godt.

La Vaguada


Det bugnar av ulike varer inne i supermarknaden.
Dette frå eit stort område med berre frukt.

På kvelden samlar vi oss til felles middag og deler opplevingar og ny kunnskap. Dagen etter skal vi møte hos Innovasjon Noreg sitt kontor i Madrid, i den gamle ambassadebygningen. Antrekket frå fiskemarknaden blir bytta med forretningsantrekk. Dette blir spanande.


Torsdag 7. juni
Kontakten til Innovasjon Noreg sitt kontor i Madrid er ordna gjennom Innovasjon Noreg i Ålesund. Vi blir tatt vel imot av Ole Homb (frå Toten) og Lieneke Fjørtoft.
Ole Homb har tidlegare hatt samarbeid med Senter of Ekspertise i Ålesund og vore involvert i vidareføringa av TAF-ordninga, der Haram vidaregåande skule har vore ein sentral aktør sidan 1997.

Lieneke Fjørtoft (Ålesund) med slekt på Fjørtoft, og med lokalkunnskap derifrå, kunne frette nytt frå elevane våre, Marianne og Kristine, begge frå Fjørtofta.
Lieneke Fjørtoft er utdanna Diplom Eksportmarknadsførar frå Norges Markedshøyskole, og har i mange år vore administrasjonsansvarleg ved Den Cubanske Ambassade i Oslo.

Interessant og lærerik føremiddag
Vi fekk ein interessant og lærerik føremiddag, og eit glitrande foredrag om handelen mellom Noreg og Spania og om kva for utfordringar og moglegheiter dei såg for seg. Vi fekk og kunnskap om spansk kultur og tradisjon. Mange av dei tinga vi hadde lagt merke til på MercaMadrid, i supermarknadane og i Madrid elles, fekk vi og svar på. Det blei og stilt problemstillinga om kvinna si stilling i Spania, der vinklinga gjekk ut på at kvinner i Spania kan ha større makt enn kvinner i Noreg. Noko som kan kome av makta kvinnene har i heimen og i familien, samt gjennom posisjonar familien har i samfunnet. Staten har mindre innverknad på forretningslivet i Spania enn i Noreg, mens privat forhold, familien og familieband har stor innverknad.

Vi får vite at Noreg har omfattande handel med Spania innan tre områder i tillegg til olje og gass. Det gjeld fisk, skipsutstyr og turisme (eksporterer Fjord Norge).
Møre og Romsdal er stor innafor alle desse næringsområda. Handelen mellom Spania og Noreg går nesten i balanse dersom ein ser bort frå eksporten av olje og gass. Madrid har den nest største fiskemarknaden i verda. Det er, som sagt, berre Tokyo som er større.

Ole Homb gir også råd i samband med utdanningsvegar, og brukar seg sjølv som eksempel. Å konkurrere med 1000 siviløkonomar om jobb kan vere hardt. Men mellom desse er det kanskje berre 20 – 30 som har velt å fordjupe seg i spansk. Vidare spesialisering og nisjetenking kan gi jobbmuligheiter innafor spesielle interessefelt. Desse vil ha ein kjempefordel, dersom dei ønskjer seg draumejobben i eit spansktalande land eller handle med spansktalande.

Inntrykk frå byen Madrid
Då vi forlet den gamle ambassadebygningen og Innovasjon Noreg sitt kontor i Madrid, har vi enno nokre timar på oss til å oppleve Madrid, før vi tek flyet heim.

Palacio Real - Kongepalasset i Madrid
(Bygd i perioden 1738-64)


Det imponerande byggverke vart ferdig i 1764,
og skulle erstatte Alcazar-slottet, som brant ned tretti år tidlegare.

Kongepalasset var tidlegare residens for dei spanske kongane, men i dag
bur den spanske kongefamilien i det langt mindre palasset Zarzuela.

Katedralen La Almudena


Katedralen La Almudena ligg vegg i vegg med kongepalasset,
men er av "nyare" dato. Katedralen sto ferdig for 14 år sidan ...
(Byggjetid 1879 - 1993)

Både katedralen og slottet grensar inn mot det som i dag
vert rekna som det gamle Madrid.

Katedralen sett frå ein annan vinkel.

Buane mellom Palacio Real og katedralen.

Detalj
frå det vakre bygget

Passasjen
til Plaza Mayor

El Ritiro - ein vakker park-oase i Madrid


Ikkje rart vi koste oss dei siste timane våre i Madrid!

Veret var nydeleg, omgjevnadene estetiske og rolege,
trass i at vi var midt i storbyen.

Slik hadde vi det.

Inntrykka vert mange, både frå den forretningsmessige delen av turen, men og frå besøka i katedralen La Almudena, palasset Palacio Real, musea, Plaza Mayor, dei fine parkanlegga, alle folka vi møtte i ulike samanhengar, og sjølvsagt, den sosiale delen.

Kunnskapen ein fekk med, veg ikkje mykje, den er lett å ta med og kan hende kan den brukast vidare i livet.


Med helsing 3IBD og J.M.Helland





Huff da - skodde i Samfjorden ...

Etter strålande dagar i Madrid var det ikkje berre, berre å sjå heimlege trakter igjen. Kvardagen, og skodda, vinka til oss idet vi nærma oss Ålesund lufthavn, Vigra.


Faglege turar

Hovudsida