HVS

HVS Hovudside

Visjon
Administrasjon
Personale

Biblioteket
Boklister
Diverse informasjon
Mål- og tiltaksplan
Reglement
Skulerute

Storyline ved HVS
Utviklingsarbeid
Yrkesmessa

Kontakt HVS

Elevkvardagen

Kva skjer
Helsetenesta
Rådgjevar

Ut av klasserommet!

Skule + næringsliv
Faglege turar
Aktivitetsdagar

Studietilbod

Studietilbod ved HVS
(Revidert 2006)

Kunnskapsløftet 2006
Læreplanar (alle fag)

Du er her: Faglege turar > EB2 - Praksis i Brussel våren 2009

Utplassering ved
Vest-Norges Brüsselkontor

08. -11. mars 2009

Søndag den 8. mars 2009 sette 4 spente ungdommar frå Haram vidaregåande skule seg på flyet frå Vigra til Gardermoen.
Dei 4 var 3ST-elevane Kristoffer Engeseth, Jardar Bruun Teigen, Vegard Nerås Krogsæter og Amina Mercic. Grunnen til at vi var spente, var at vi skulle vere «prøvekaninar» for eit nytt utplasseringsprosjekt ved Vest-Noreg sitt Brüsselkontor (VNB). Eit prosjekt som viste seg å fungere svært godt!

Ein skjerpande start
Etter å ha landa på Gardermoen gjekk ferden raskt vidare til København, og til slutt Brussel.

Frå flyplassen utanfor Brüssel, tok vi taxi inn til hotellet vårt. Guttorm Ulla og rektor Jan Magne Helland var med som reiseleiarar/observatørar. Guttorm representerte Haram kommune og NHO. Jan Magne, naturleg nok, Haram vidaregåande skule.

Etter at vi hadde installert oss på hotellet vårt, Catalonia Forum, var det på tide å få i seg litt mat etter ein dag med reising.
Etter eit godt måltid på ein av dei mange restaurantane i Brüssel, fekk vi ein dårleg start, økonomisk sett.

Eit spent reisefølge
kjem endeleg fram til Brussel

Rekninga var langt høgare enn den burde ha vore og vi skjønte straks at vi hadde blitt lurt. Dette var sjølvsagt forsmedeleg for oss sunnmøringar (...), men det var lite vi kunne gjere, og vi reiste tilbake til hotellet.

Ein real arbeidsdag
Måndag 9. mars var vi klare for første arbeidsdag ved Vest-Noreg sitt Brüsselkontor. I nye dressar møtte vi traineen John Tveit utanfor hotellet. Han viste veg fram til kontoret, og etter ein liten halvtime var vi framme ved «Norway House». «Norway house» ligg rett ved kommisjonsbygninga og rådsbygninga i EU-distriktet i Brüssel.

I EU-parlamentet

Fire engasjerte HVS-elevar poserer inne i Europa-Parlamentet.

F.v: Kristoffer Engeseth, Amina Merzic,
Jardar Bruun Teigen og Vegard Nerås Krogsæter.

Inne i «Norway house» møtte vi direktøren for Vest-Norges Brüsselkontor, Merete Mikkelsen. Saman med ho hadde vi eit måndagsmøte, der ho orienterte oss om kva vi skulle gjere gjennom opphaldet vårt i Brüssel, ho gav og litt informasjon om kontoret og kva oppgåvene til kontoret er. Vi prata og litt om forventningar vi hadde til opphaldet. Etter dette starta vi på arbeidet vårt med å finne aktuelle saker til nyheitsbrev som kontoret dagleg legg ut på nettet.

Etter å ha jobba med dette ei stund fekk vi vere med som observatørar på eit møte. Møtet vart enkelt og greitt kalla: Gjensidig orienteringsmøte for EU si grønnbok om det transeuropeiske transportnettverket (TEN-T) hos den Norske EU-delegasjonen (!)
Som observatørar for dette møtet fekk vi oppleve byråkrati i praksis, noko ein spesielt merka på språket.

EU-kvartalet
Etter eit interessant møte skulle vi få ei omvising i EU-kvartalet. Vi fekk sjå Europaparlamentet frå innsida ved å vere med på ein audio/visuell-tur. Her fekk vi vere med inn i sjølve parlamentsalen, som forøvrig er verdas største. Dette var særs spanande, sjølv om informasjonen vi fekk gjennom den audio/visuelle-omvisinga var rimeleg overflatisk.

Audio/visuell presentasjonen i Europa-Parlamentet

Etter å ha fått omvising på parlamentet var vi innom EU sitt informasjonssenter. Her fekk vi med oss eit utal brosjyrar og hefter om ulike tema i EU. Besøket hos informasjonssenteret vart avslutta med ein uformell flagg-quiz. Som avslutning av omvisinga i EU-kvartalet var vi raskt innom Rådsbygninga og såg på det omdiskuterte tsjekkiske kunstverket som er utstilt der. Kommisjonen besøkte vi ikkje denne dagen, sidan vi skulle ned å sjå på den neste dag.

Etter å ha sett litt på kunstverket i rådet var arbeidsdagen slutt. Vi hoppa på metroen og sette kursen mot hotellet.
Vi slappa av på hotellet ein times tid, og for så ut for å ete middag. Vi gjorde det til ein billigare affære denne gongen. Sidan vi alle saman var trøtte etter ein lang dag, drog vi tidleg tilbake til hotellet.

Ny dag, nye utfordringar!
Tysdag 10. mars byrja vi dagen med ein svært god frukost på hotellet. Etter frukosten var ferdig gjorde vi oss klar for ein ny arbeidsdag og sette oss etterkvart på trikken. 45 minutt seinare var vi framme ved kontoret. Der venta Jon og Merete på oss med nye arbeidsoppgåver og nye utfordringar. Merete fortalte at vi skulle få delta passivt på eit internasjonalt møte denne dagen.

Sofistikerte byråkratar klare for internasjonalt møte!

Noko vi merka oss var måten dei førebudde seg til møta dei skulle på. Vi fekk blant anna utdelt forskjellege ark med bakgrunnsinformasjon for møtet, noko som var svært nyttig. På den måten var det mykje lettare å følgje med, og å delta, på møta. Ei nyttig erfaring for oss som vanlegvis møter opp ubudd til alt frå undervisning til russemøter... Så etter ei god stund med førebuing var vi klar.

Sjølve møtet var svært interessant. Det var det første internasjonale møtet som nokon frå gruppa nokon gong hadde delteke på, med aktørar frå blant anna Spania, Polen, England og Danmark. Utsendingane frå dei ulike landa hadde danna ei gruppe som skulle arrangere ein konferanse for blant anna miljø og demografi, hovudsakleg innanfor Europa. Heile gruppa hadde stort utbytte av dette møtet. Vi fekk oppleve korleis internasjonale aktørar samarbeider på tvers av landegrensene og sjølve temaet var interessant.

Då vi kom heim frå møtet fekk vi våre første konkrete arbeidsoppgåvene på Vest-Norges Brüsselkontor.Vi skulle skrive ein rask introduksjon til to av sam-

Ein fokusert Kristoffer jobbar
for EU-sitt ve og vel ...

arbeidskommunene til kontoret, nemleg Ålesund og Nordal, samt fylket Møre og Romsdal. Denne informasjonen skulle seinare leggjast ut på heimesida deira, og måtte sjølvsagt vere på både norsk og engelsk.

Ei grei utfordring for fire etterkvart verdsvante HVS-elevar. I kjend stil rakk vi derimot ikkje å bli ferdig med jobben, og vi blei einige om å gjere resten ferdig dagen etter.

No skulle vi nemleg få ei innføring i EU sine institusjonar frå Kari Bjørke, som jobbar hjå den Europeiske Kommisjonen. Ein artig detalj var at Kari faktisk var i slekt med Vegard, noko som medførte ein heil del small-talk for globetrotteren frå Krogsætra.

Etter ei forholdsvis lang innføring i enda meir byråkrat-sjargong tok Kari oss med på ei omvising i Europakommisjonen. Nok ein gong merka vi oss det strenge fokuset på tryggleik, sidan vi måtte gjennom enda ein tryggleikskontroll.
Heldigvis slapp alle inn i kunnskapen si vugge og første stopp i kommisjonen var presserommet til Europakommisjonen. Dette var eit av høgdepunkta i turen. Vi fekk på nær hald sjå den store salen som dei fleste hadde sett på tv, og etter mykje "om og men" samla vi nok mot til å gå opp til talarstolane.

Amina og Jardar hadde mykje å seie til dei "frammøtte" !!!

Talarstolane blei raskt åstad for mykje fjas, og sjølvsagt mykje bilete. Etter at minnekortet på kameraet var fullt, såg vi oss litt rundt i bygget, før vi avslutta arbeidsdagen. Vi takka Kari for omvisinga og sette kursen for Brüssel-sentrum og belgiske vaflar. Sjølv om vi fort fann ut at dress og belgiske vaflar med sylte frå gatebod var ein dårleg kombinasjon, var vi særs nøgd.
Sidan det byrja å bli seint og alle i gruppa var sliten og i lite humør for shopping, tok det ikkje lang tid før vi bestemte oss for å ta ein taxi tilbake til hotellet.

Viktig å bli kjend med Brüssel sitt restaurantliv
Etter eit par timar på hotellrommet var guttaboys (og Amina) nok ein gong klare for nye eventyr. Vi møtte den eldre garde (rektor Jan Magne Helland og Guttorm Ulla), samt Merete og Jon, på Grand Place, før utflukten gjekk vidare til ein lokal restaurant som Merete visste om. På veg til restauranten merka Guttorm seg korleis vi eigentleg såg ut, utan dress og lakksko.

Fellesmiddag på lokal restaurant i Brüssel.

Rundt bordet frå venstre:
Guttorm Ulla, Merete Mikkelsen, Amina, Vegard, Kristoffer, Jardar og Jon Tveit.
Rektor Jan Magne Helland er bak kamera.

Måltidet på restauranten var fantastisk. Dessutan kom enda eit av høgdepunkta på turen til under middagen, nemleg Guttorm sin episke kommentar om engelsken til Petter Solberg; «It's not the fart that kills, it's the smell». Denne kommentaren vakte stor begeistring og gjorde heile følgjet klare for ein pub-runde på stampuben til Jon. Vi må kommentere; - ein pub som hadde heile 2000 ølsortar (!)

Siste dag i Brüssel
Onsdag 11. mars var siste dagen i Brüssel. Dette tykte heile gjengen at var svært vemodig, sidan vi treivst særs godt. Dagen byrja på lik linje med dei førre dagane, med ein god frukost og trikk/metro til kontoret. Det første på agendaen denne flotte vårdagen, var eit møte/forelesning på kontora til NHO. I likskap med dei andre møta vi hadde delteke på, var dette òg svært lærerikt. Vi fekk mykje informasjon om både NHO og Noreg si rolle i EU.

Etter møtet arbeida vi vidare med oppgåvene. Denne dagen jobba vi, i motsetning til dagen før, i kamp mot klokka. Produktet skulle vere ferdig før vi drog heim. Arbeidet blei likevel avbroten av enda eit møte. Denne gongen var det eit møte med to norske traaineear i Brüssel. Dei fortalte litt om EU og om korleis det var å vere trainee i Brüssel, noko som tydelegvis ikkje var nokon dans på roser.
Møtet med traineeane vart avslutta med ein svært høgtidleg quiz, der Jardar trakk det lengste strået. Han vann både respekt og ein samle-CD med Edward Grieg, som traineeane hadde knabba frå den norske delegasjonen.

Når Jardar omsider kom seg ned på landjorda igjen, venta arbeidet med stoff til heimesida, samt ei ny oppgåve om å skrive nyhendebrev. Til denne oppgåva skulle vi bruket stoffet som vi fann første dagen på kontoret. Heldigvis rakk vi å gjere ferdig oppgåvene, og Merete var fornøgd med resultatet.

No var klokka plutseleg 1600, og tida for avreise var komen. Etter eit tårevått farvel med Jon og Merete, var vi på veg mot flyplassen. Sjølv om alle var trøtte og slitne, gjekk reisa heim fint (med unntak av ein svært pratsom kvinneleg taxisjåfør frå Vigra til Brattvågen).

Eg og Kristoffer vil, på vegne av gruppa, takke HVS og Vest-Norges Brüsselkontor for eit fantastisk opphald i Brüssel. Vi tykkjer at opplegget var svært lærerikt, kjekt og interessant. Turen blir rett og slett eit minne for livet. Merete og Jon var svært dyktige, og vi følte at vi fekk ei god innføring i korleis dei arbeidde på Vest-Norge sitt Brüsselkontor. Absolutt noko å satse vidare på!

Med vennleg helsing
Jardar og Kristoffer

Lenker:
Kva er VNB?
VNB - Vest-Norges Brüsselkontor
Kronprinsen opna Vest-Norges "nye" Brüsselkontor

Hovudsida