Du er her: Artiklar

Flytter klasserommet ut i verda
Frå Sunnmørsposten 28.01.03
Johan Behrentz


Mange av elevane ved Haram vidaregåande er allereie godt internasjonalt orientert, men næringslivet ser fram til å få ei ny internasjonal line med vekt på handel. Foran frå venstre: Therese Helland, Susanne Snipsøyr og Beate Osvik. Bak: Alice Jeanette Vatnehol, Johan Longvanes (Haram Næringslag), Jan Petter Hagen (Søviknes verft), Stig Bjørkedal (Rolls-Royce), Ivar Roald ( Haram vidaregåande) Anne Margrethe Søviknes og Gro Mari Silseth.

Brattvåg: Tunge industrilokomotiv i Haram bringer skulen ut i verda. Elevar ved Haram vidaregåande skule skal lære seg internasjonal samhandling.

Dei som ønskjer å bli noko i livet, må orientere seg om utviklinga på den internasjonale arenaen. Vi må lære oss samhandel med utlandet for å berge arbeidsplassar her heime, seier næringslivstoppar i Haram til Sunnmørsposten. Dei har store forventningar til det nye business-faget ved skulen.

Hjelpe mindre verksemder
Dei store verksemdene, særleg Rolls-Royce og Aker yards har orkesterplass til trender og utvikling innan sine felt rundt om i verda. Sidan midten av 1980-åra har det gått føre seg eit samarbeid mellom næringslivet og skulen. Det var difor naturleg for verksemdene å vidareføre dette ved å dele noko av kunnskapen sin om marknaden ute i verda. Etter månader med førebuing, vart det nye internasjonale faget lansert like etter nyttår. No fell detaljane på plass, og både leiinga ved skulen og næringslivet store forventningar til det nye faget.

Vi har ein skog av mindre og mellomstore verksemder i Haram. Dersom dei skal overleve i framtida må dei operere på den internasjonale arenaen. Det gjeld både kontakt med kundar og innkjøp. Små verksemder har i dag ikkje ressursar til dette åleine. Vona er difor at vi med tida kan få attende leiarar som kan tilføre verksemdene den naudsynte kompetansen på dette området, seier leiaren i Haram Næringslag, Johan Longvanes til Sunnmørsposten. Han ser mørkt på framtida dersom det ikkje skjer.

Konkurranse om fag
Elevar frå Haram og kommunar rundt kan frå i vår av søkje på grunnkurset til det nye allmennfaget. Skal dei henge med dei to neste åra, må dei konkurrere med karakterar. På den nye internasjonale lina vil ein få lære korleis ein kan starte og drive si eiga verksemd. Ein vil få innblikk i korleis ein oppfører seg overfor kundar og samarbeidspartnerar, anten dei bur i Asia eller i England. Dei vil også få ein tur til utlandet som ein del av undervisninga. Haram vidaregåande skule etablerte for få år sidan ei TAF-line, ei allmennline med vekt på ingeniørfag. Denne line har vore svært populær. Vona er at tilbodet vil gi dyktige ingeniørar og arbeidarar attende til næringslivet i Haram. Ei gruppe på 12 elevar følgjer VK1- og VK2-kursa i dette allmennfaget og Ivar Roald ved Haram vidaregåande skule reknar med at den internasjonale line vil ha om lag tilsvarande elevtal.

Elevar som har gått TAF-lina er meir medvitne om kva veg dei vel vidare enn andre elevar. Vi vonar at dette også kan bli resultatet av det nye studietilbodet, seier Roald.

Raske endringar
Plassjef Stig Bjørkedal ved Rolls-Royce i Brattvåg seier til Sunnmørsposten at endringane på den internasjonale arenaen skjer raskare enn ein klarar å snu seg. Både leverandørar og kundar er stadig i endring.

Vi ser at skipsbygginga i aukande grad flyttar seg. Vi må stadig snu oss rundt. Vi ønskjer å dele kunnskapane om marknaden med elevane, slik at dei skal ta dei rette vala for vår framtid, seier Stig Bjørkedal. Rolls-Royce har verksemd i ti land, noko som setter ekstra krav til rask omsnuing.

Skulen er den viktigaste læringsarenaen, og det er viktig at ein får forståing og kompetanse om internasjonale tilhøve så tidleg som råd er. Målet er å behalde arbeidsplassane i Norge. Vi må gjere oss konkurransedyktig i ein stor verdsmarknad, seier Bjørkedal. Det same seier kollegaen i Aker Yards, Jan Petter Hagen frå Søviknes verft. Han vonar at elevane får ei forståing for kva krefter som påverkar næringslivet.

Felles arena
Haram kommune har lenge hatt eit nært samarbeid med næringslivet, og dette samarbeidet blir vidareført i utforminga av det nye faget ved Haram vidaregåande skule. Rådmann Jan Petter Eide ser for seg det han kallar eit "innovasjonsstudio" ved Haram vidaregåande skule, der kompetanse kan flyte båe vegar, til og frå næringslivet.

Det kan verte ein ny møtestad der grensene mellom skule og næringsliv blir oppheva. Også offentlege tilsette vil kunne ha nytte av denne møtestaden, seier Eide, som håper at det nye breibandet som etter kvart blir bygd opp i kommunen kan nyttast for å bringe dei ulike aktørane saman.



Spennande i utlandet
Frå Sunnmørsposten 28.01.03
Johan Behrentz

Dei orienterer seg ut i verda, jentene ved Haram vidaregåande skule. Nokre av dei har vore utvekslingsstudentar. Andre har representert Norge i internasjonale fora.

Det er kjekt å bli kjent med framande kulturar. Eg har lyst til å studere i utlandet, seier Anna Beate Osvik, som har bak seg eit opphald i Sør-Afrika. Alice Jeanette Vatnehol har vore i Italia saman med det Europeiske ungdomsparlamentet. Therese Helland skal representere skulen på en ingeniørkonferanse i England, medan Susanne Snipsøyr har vore eit år i USA.

Det gav meirsmak, seier dei aktive jentene, som vil ut i verda etter skulegangen i Haram.

Men vi ønskjer å reise heim når vi skal etablere oss. Når vi har vore i utlandet ei stund, må vi heim til kjøttkakene hennar mor, seier jentene og smiler.