Korleis gjere HVS meir attraktiv? Russeavisa har løysinga:

Bygg aktivitetspark!
Av Ingrid Klokk

Haram vidaregåande skule har i mange år hatt nedgang i søkartala. Det har blitt hevda at årsaka til dette er at ungdommen søkjer seg til meir urbane strøk.
Elevar ved skulen er ikkje samde i dette, og meiner løysinga er å oppgradere uteområdet. Byskulane kjem til å verte nedlagde når HVS får ein aktivitetspark
rundt skulen!

Elevane på HVS har lite å ta seg til med i friminutta og i fritimane. Har ein ikkje interesse av å inhalere CO2, nikotin, tjære og anna styggedom i røykekråa, blir dei fleste sitjande inne framfor datamaskinene, sjølv kor fint vêr det er. HVS har tidlegare prøvd å lokke til seg nye elevar med å skryte av sitt fantastiske datautstyr, utan at det har blitt særleg vekst i søkjartala. No tenkjer du kanskje: ”Men dette kan då ikkje stemme! Eg las då i Haramsnytt at det var oversøkjing til skulen i år?!” Du har rett i det, men det som ikkje har kome fram, er at det
vart lagt ned ei allmennklasse med 28 elevplassar i fjor! Men det var ikkje utdanningspolitikk denne artikkelen skulle handle om, så tilbake til saka.
Altså: Vi meiner at det som skal til for å få fleire søkjarar, er ei formidabel oppgradering av uteområdet. HVS sitt lokkemiddel, data, er rett og slett ein trussel mot den nasjonale folkehelsa. Ungdom treng aktivitet og frisk luft når dei ikkje sit henslengt på uergonomiske pultar! Difor bør det byggjast ein aktivitetspark ved skulen. Då kjem nok elevar strøymande frå både fjern og nær…

Skøytebane
Området til HVS har stort potensiale til forbetring. Frå 1. august 03 skal alle vidaregåande skular i landet verte røykfrie, Haram vgs er ikkje noko unntak. Då vert eit delvis overbygd område ståandes ubrukt. Ved å forlenge taket og å installere frysekablar i bakken, vil skulen få ei flott, heilårs skøytebane. Her kan
ungdommane utfolde seg med kunstløp, isdans, ishockey, isfiske, eller kva dei måtte ønskje.

Curling
Curling er ein idrett i sterk framvekst. Denne idretten foregår vanlegvis på is, men
”Røykekråa Isarena” vert nok for liten for denne populære aktiviteten. Derimot er det fleire lange korridorar på HVS som utpeikar seg som ypperlege til dette føremålet. Den såkalla ”maskergangen” i nybygget er truleg mest aktuell.
Å få til ei curlingbane her vil heller ikkje koste mykje. Det einaste som skal til er at vaskedamene er litt meir spandable med bonevoksen. Som steinar kan ein nytte gamle skulebøker, og kostar er det tilbod på på Båt og Fritid.

Tarzanløype i skogen
Like bak skulen ligg eit flott, ubrukt skogsområde. Her ser vi for oss ei tarzanløype med løpestrengar, slenger, fjellklatring, balansering og mykje meir. Enkelte elevar har allereie byrja på opparbeidinga av denne løypa med å brøyte ned tre med personbilar… I same område kunne ein hatt hoppeborg, rampoliner,
sandkasse, dissestativ og diverse leikeapparat. Ein kunne også bygd ei go-kart
bane, samt ei trial-løype, slik at moped-rånarane (maskerane) ved skulen fekk litt meir spenning enn å køyre på gangvegen opp Skaret.

Frå vasstårn til mummihus
Det grå vasstårnet som står og ruvar i terrenget like ved skulen, er ikkje direkte vakkert. Med litt måling og ymse vindauge og dører ville dette bli heilt identisk med mummihuset kjend frå ”Mummitrollet” på Barne-TV. Det ville ikkje berre gjere nærområdet vakrare, men også føre til storinvasjon av turistar til Haram. Dessutan ville vi vere med på å bevare vegetasjonen i Finland. Finland blir jo
nærast nedtrakka av folk som skal vitje Mummiland. Brattvåg Vassverk burde også gje HVS rett til å disponere vassrøret som går frå tårnet og ned til sentrum. Dette ville bli ei utmerka vass-sklie. Elevane ville då også sleppt å gå ned den ekstremt bratte råsa like ved, og på den måten også spart vegetasjonen i Haram
for unødig slitasje. Det er ikkje store investeringane som skal til for å gjere
Haram vidaregåande skule meir attraktiv. Både befolkninga, handelsstanden og det lokale næringslivet bør kunne bidra til finansieringa av dette. Vi oppmodar Haramsnytt til å setje i gang kronerulling!