| |
Yrkesmessa 2002 vel i hamn!
Bilde
frå messa
Bilde frå utstillarane
Yrkesmessa 2002 er over, og Haram vidaregåande skule håper
at messa har gjeve ungdomsskuleelevar i Haram, Midsund og
Sandøy lyst til å søkje på tilboda her ved skulen.
Yrkesmessa har som mål å syne det mangfaldet av arbeid og
utdanningsvegar som finst i Haram, Sandøy og Midsund, og utan
hjelp frå kommunane og dei ulike bedriftene hadde dette vore
vanskeleg.
Ungdomsskuleelevane fekk omvising av dyktige guidar frå Haram
vidaregåande skule, og dei var innom åtte ulike utstillarar.
Utstillarane hadde eit kvarter på å orientere elevane som
vitja standen deira, og dei fleste hadde med seg lærlingar
som kunne greie ut om sitt eige utdanningsval. Etter ei runde
med orientering fekk elevane prøve maten i vår framifrå kantine
- og vi veit at det gav meirsmak!
I tillegg til omvisinga fekk elevane ei grundig orientering
om skulen sin pedagogiske plattform. Inspektør I, Jan Magne
Helland, gjorde greie for teoriane bak desse arbeidsmåtane,
og Haram vidaregåande skule sine eigne elevar viste dette
i praksis.
Etter at omvisinga var slutt, fekk alle elevane vere med på
ein konkurranse der dei vitja fire nye utstillarar, og på
denne måten fekk dei svar på spørsmål som var relaterte til
bedrifter eller ulike utdanningsvegar. Resultatet frå denne
konkurransen vil kome på heimesida vår neste veke.
Torsdagskvelden var messa open for publikum. Spesielt inviterte
var 9. klassingar og føresette. I tillegg til å gå rundt å
vitje dei ulike utstillarane, fekk dei frammøtte høyre på
elevar frå Haram vidaregåande skule og partnerskapselevar
frå Brattvåg ungdomsskule.
Både våre eigne elevar og elevane frå Brattvåg ungdomsskule
imponerte med gode presentasjonar og sikker framføring. Det
er tydeleg at elevane har fått øvd seg i å stå fram for eit
publikum, og at dei i tillegg har den faglege kunnskapen som
skal til for å gjennomføre ein god presentasjon.
Elevane frå Haram vidaregåande skule presenterte ulike prosjekt
og synte arbeidsmåtar med utgangspunkt i tankane bak Storyline
og Pilot, medan elevane frå Brattvåg ungdomsskule presenterte
samarbeidet dei har til bedrifter i Haram kommune.
Det er mange som er involverte rundt å avvikle ei yrkesmesse,
og skulen skulle ønske at fleire tok seg tid til å vitje dei
ulike utstillarane den tida messa var open torsdagskvelden.
Det ligg mykje arbeid og prioriteringar bak både frå skule
og næringsliv, og det er god plass til alle som vil møtast
for å orientere seg eller treffe andre.
Haram vidaregåande skule ønskjer å takke alle bedrifter, ungdomsskular,
lærarar, eigne elevar og andre samarbeidspartar som har vore
med på å få messa i stand. Vi ønskje alle elevar eit godt
skuleval og ønskjer alle vel møtt til neste år!
|
|
